Dismayado ang transport sector sa ginahimo karon sa gobyerno nga pag-atubang sa krisis sa lana nga nakaapekto sa tanang sektor sa nasud, kini subay na sab sa pagsuspende sa Presidente sa pagpataas sa pletehan sa mga pampublikong sakyanan.
Sumala pa ni Joel Gabatan, UNIDA President nga nagmulo na sila sa kataas sa presyo sa krudo. Gani, apektado na ang ilahang kinitaan sa pagpamasahero. Halos sa mga driver wala nay ma-take home tungod kulangon pa sa krudo ug sa ilang boundary.
Saysay pa ni Gabatan nga kung magpadayon ang kakuwang sa tabang alang sa ilang sektor, dili sila magpanuko sa paglunsad og transport strike aron nga mahatagan sila og pagtagad.
Matod pa niya, nga gihikay naman nila ang tanang dokumento aron unta makapangayo og ayuda sa gobyerno sama nalang sa cash assistance sa DSWD ug fuel subsidy sa Department of Transportation apan hangtod ning kasamtangan wala pa silay nadawat.
Nanawagan sab sa Land Transportation Franchising and Regulatory Board ang ubay-ubay ka van drivers sa Dakbayan sa Cagayan de Oro nga mahatag na sa ilaha ang Fuel Subsidy gikan sa Gobyerno aron magamit unta nila sa pagpalit og bugas nga madala sa ilang pamilya.
Sumala pa ni Dondon Epan, dispatcher sa MANTRANSCO, mga pampasaherong van nga biyaheng Cagayan de Oro – Manticao Vice Versa nga tungod sa ka mahal karon sa presyo sa krudo nga niabot na sa 90 ngadto sa kapin 100 pesos ang litro, wala nay halos kita ang ilang mga drivers sa tibuok adlaw nga pamasada.
Kung sa una nga wala pay krisis sa gasolina, maka take home og 700 ngadto sa libo kapin ang limpyo nga kita sa driver matag adlaw, karun nag dula na lamang sa 300 pa ubos, usahay wala gyud bisag piso.
Gani matod pa ni Epan nga pipila na usab ka drivers nila ang ni undang na sa pamasahero gumikan kay dili na igo ang ilang kita.
Photo courtesy: Dreams Time
