Nisaysay sa iyang mulo ang usa ka mananagat gikan sa Tandag City kalabot sa grabeng epekto sa pagsaka sa presyo sa lana nga nakapalisod kanila karong panahona.
Gibutyag ni Jovanie Infiesto, residente sa Barangay San Agustin Sur, nga tungod sa kamahal sa krudo, mapugos sila sa pagbiyahe hangtod na sa kadagatan sa Siargao aron lang makapanagat. Matod pa niya, moabot ngadto sa 3,000 pesos ang ilang magasto sa krudo pa lamang, hinungdan nga bisan og aduna silay makuha nga isda, kulangon gihapon kini aron mabawi ang gasto sa krudo ug matubag ang inadlaw-adlaw nga panginahanglan sa iyang pamilya.
Gihulagway ni Infiesto nga mas dako pa unta ang ilang mapuno sa bulsa o ang ilang “net take home pay” kong barato pa ang presyo sa petrolyo, apan sa kasamtangan, dakong bahin sa ilang kita ang napadulong lang sa gasolina. Tungod niini, tinguha sa mga mananagat nga pasakahan na lang usab og gamay ang presyo sa ilang baligya nga isda sa merkado aron makabawi sa puhunan.
Alayon niini, nanawagan usab karon ang pipila ka mga grupo sa mananagat ngadto sa gobyerno nga hatagan unta sila og subsidy o hinabang aron makuhaan gamay ang gibug-aton sa krisis nga ilang giatubang ning kasamtangan.
