Gipasalig sa Cagayan de Oro City Water District (COWD) nga mapadayon ang suplay sa tubig sa mga konsumidor sa Cagayan de Oro City bisan pa sa ginahimong repair sa Cagayan de Oro Bulkwater Inc. o COBI.
Sumala ni Dean Gerry Cano, Chairman of the Board sa COWD, plano unta sa COBI nga magpadayon og usa ka bulan nga padyon nga repair sa ilang mga tobo, nga posibleng moresulta sa usa ka bulan usab nga walay tubig ang mga konsumidor.
Apan tungod sa kabug-at sa epekto niini, giingon ni Cano nga gibarugan sa COWD nga dili kini dayon buhaton sa usa ka higayon, kundili ipatuman sa phase-by-phase nga paagi aron makapangandam ang mga residente ug malikayan ang dugay nga water interruption.
Gipatin-aw usab nga ang gihimong trabaho sa COBI naglangkob sa repair ug rehabilitation sa ilang bulk water facilities ug pipelines, nga hinungdan sa hinay hangtod sa posibleng pagkawala sa suplay sa tubig sa pipila ka lugar sa syudad.
Gipasabot sa COWD nga bisan pa sa sitwasyon, padayon silang nangita og paagi aron maminusan ang epekto sa water interruption ug masiguro nga aduna gihapoy magamit nga tubig ang mga konsumidor samtang ginahimo ang mga kinahanglanong ayuhon sa water system.
Photo courtesy: Cagayan de Oro City Water District/ Facebook
