Nagpahayag si kanhi Ilocos governor Luis “Chavit” Singson, nga andam siyang motestigo sa Senado ubos sa Senate Blue Ribbon Committee kabahin sa giingong anomalya sa mga flood control projects.
Sumala usab kang Panfilo “Ping” Lacson, Senate President Pro Tempore, personal nga miduol si Singson kaniya aron ipadayag ang intensyon nga motambong sa sunod nga pagdungog sa komite, nga iyang gidawat.
Dugang ni Lacson, isip kanhi gobernador, responsibilidad na ni Singson kung mosulti ba kini sa tinuod atol sa imbestigasyon. Sa miaging pakighinabi, giingon ni Singson nga angay nang sugdan sa gobyerno ang imbestigasyon sa flood control projects sa Ilocos Norte, nga nasakupan sa pamilyang Marcos, ug iyang gipasanginlan nga adunay kalambigitan ang pipila ka contractors sa maong isyu.
Gibutyag usab ni Lacson nga ang sunod nga tentative hearing gitakdang ipahigayon sa Abril 14, 2026, human sa break sa Senado alang sa Holy Week. Mag-adjourn ang Senado karong Marso 21 ug mobalik sa sesyon sa Mayo 3, 2026. Samtang, gitun-an pa sa komite kung imbitahon ba ang gitawag nga “18 ex-Marines” isip resource persons sa maong pagdungog.
Matod pa ni Lacson, posibleng mahimong sensitibo ang sitwasyon kon adunay mosangpot sa pag-cite og contempt batok sa mga resource persons kung mapamatud-an nga adunay nagsulti og dili tinuod.
Photo courtesy :PEP.ph
