Pormal nang gipermahan sa City Government of Tagum, Rotary Club of Tagum, ug Department of Trade and Industry (DTI) – Davao del Norte Provincial Office ang usa ka Tripartite Memorandum of Agreement alang sa implementasyon sa BAMBUHAY Program, nga nagtumong sa pagpalambo sa panginabuhian ug pagpalig-on sa komunidad pinaagi sa paggamit sa kawayan.
Sentro sa maong inisyatiba ang pagtukod sa Bamboo and Handicraft Innovation and Training Center sa piniling mga barangay sa Tagum City.
Kini nga pasilidad magsilbing sentro sa paghatag og kahibalo ug kahanas, pagpauswag sa mga produkto, ug paghimo og mga oportunidad sa negosyo alang sa mga residente nga gustong mosulod sa bamboo-based nga panginabuhian.
Lakip sa mga tumong sa maong panagtambayayong ang paghatag og regular nga training sa panginabuhian ug kahanas, ilabi na sa mga inahan nga nagpaabot sa ilang mga anak sa daycare ug uban pang kwalipikadong benepisyaryo.
Gitinguha usab niini ang pagpalambo sa malungtarong paggamit sa kawayan aron makahimo og dekalidad ug andam ibaligya nga mga produkto sama sa mga galamiton ug handicrafts.
Gilauman nga pinaagi niini nga kolaborasyon, mapalig-on ang inklusibong panginabuhian, mapauswag ang papel sa kababayen-an, ug maduso ang pag-uswag sa micro, small, and medium enterprises (MSMEs) sa Tagum City ug sa tibuok probinsya sa Davao del Norte.
