Nahimong pinakabata nga racecar sa kalibutan ang usa ka 5-anyos, nga batang lalaki sa china nakahimo og kasaysayan human opisyal nga giila isip pinakabata nga propesyonal nga drayber.
Naila ang maong bata nga si Shao Ziyan, taga China opisyal nga adunay drivers lisence ug nakadawat sa certificate sa pagbansay gikan sa RUNRACING Driving Academy, nga accredited sa China Automobile and Motorcycle Federation, niadtong Abril 9, 2023.
Sa nag edad pa ang bata ug 1 katuig, pamilyar na siya sa paggamit sa mga racing simulator. Sa wala pa siya mag-tres anyos, nagmaneho na siya og mga race kart. Sa dihang 4-anyos na siya, nagsugod na siya sa pag-salmot sa mga propesyonal nga rally event, diin nakadaog siya sa Hope Star Award sa 2023 China Rally Sprint Championship.
Nahimo usab siyang sikat sa mga sikat nga racing simulator sama sa DiRT Rally 2.0 ug WRC 10, diin nalakip siya sa top 30 sa pinakamaayong virtual driver sa kalibutan. Aron masuportahan ang talagsaong talento sa bata, ang iyang amahan namuhunan og gibanabanang 800, 000 yuan (gibana-bana nga 6.4 milyon ka pesos) aron makapalit ug mga gi assemble nga racecar ug mga advanced driving simulator.
Ang iyang amahan nagsilbi usab nga co-pilot sa mga opisyal nga karera. Bisan pa sa iyang kahanas nga makatupong sa mga propesyonal nga drayber sa racecar, si Ziyan dili gitugotan nga magmaneho sa mga pampublikong dalan.
Subay sa hugot nga pagsunod sa Road Traffic Safety Law sa China, ang tanan nga racecar nga iyang gigamit gikarga una sa mga trailer padulong sa mga lugar sa karera.
Photo Courtesy: Oddity Central
