Gipahigayon sa Land Transportation Franchising and Regulatory Board Region 10 ang pag-inspeksyon sa Westbound Terminal ug Agora Terminal ning Dakbayan sa Cagayan de Oro City isip pagpangandam sa Semana Santa travel period.
Gipangulohan ni Regional Director Alexes Joseph “Aljo” R. Bendijo ang inspeksyon aron masusi ang kahimtang sa mga pasilidad, operasyon sa transportasyon, ug kapasidad sa mga terminal tungod sa gilauman nga pagdagsa sa mga pasahero sa umaabot nga long holiday.
Nasuta sa inspeksyon nga walay water supply ang comfort room sa Westbound Terminal, apan sumala sa management, padayon na ang koordinasyon sa local water district aron mabalik ang supply sa tubig.
Matod pa ni RD Bendijo, magpadayon ang LTFRB-10 sa pakigtambayayong sa mga ahensya ug terminal operators aron masiguro nga luwas, hapsay ug komportable ang biyahe sa publiko panahon sa Semana Santa.
Photo courtesy: LTFRB Region X – Cagayan de Oro City/ Facebook
