Samaran ang usa ka 71-anyos nga mag-uuma human giingong gikulata sa iyang kauban sa pag-inom sa Purok 3, Barangay Mabaus, Carmen, Davao del Norte, niadtong nakalabay nga adlaw.
Sumala sa report sa Carmen Municipal Police Station (MPS), nakadawat sila og tawag, kabahin sa nahisgotang incident og daling girespondihan pinaagi sa Mobile Patrol 729 nga gipangulohan ni PCpl Jed Penida aron susihon ang gikataho.
Sa imbestigasyon sa kapulisan, nasayran nga ang biktima giila nga si Epifanio Egay, 71-anyos, ulitawo, mag-uuma ug residente sa maong lugar, nag-inom uban sa suspek nga si Eugenio Corpuz, 59-anyos, minyo ug mag-uuma usab.
Kalit lang matod pa gikulata sa suspek ang biktima samtang nag-inom. Samtang nasaksihan ang maong insidente ni Guillermo Acedo, 42-anyos, silingan sa biktima. Matod sa saksi, nakita na niya nga nag-inom ang biktima ug ang suspek. Apan, pipila ka oras ang milabay, nakadungog siya sa biktima nga nagsinggit og “Tabang!” kaduha o katulo ka higayon.
Tungod niini, dali siyang misakay sa iyang motorsiklo ug miadto sa balay sa biktima. Didto iyang nakita ang biktima nga naghigda na sa yuta samtang ang suspek nagdali-dali na og sakay sa motorsiklo ug mikalagiw padulong sa Purok Antipolo, Barangay Cabay-angan sa lungsod sa Braulio E. Dujali.
Daling gitawag sa saksi ang Barangay Peace and Order Chairman aron mangayo og tabang. Human niini, nadakpan ang suspek sa mga barangay tanod ug gidala sa Carmen Municipal Police Station. Dugang niini, gipahibalo na sa kapulisan sa suspek ang iyang mga katungod sumala sa balaod sa pinulongang iyang nasabtan.
Sa pagkakaron, anaa na sa kustodiya sa Carmen PNP Custodial facility ang suspek alang sa dugang imbestigasyon ug hustong lakang.
Photo Courtesy : the appeal
