Gibutyag sa militar sa South Korea nga naglunsad ang North Korea og kapin sa 10 ka ballistic missiles paingon sa dagat niadtong Sabado, dungan sa military drills sa US ug South Korea.
Matod sa Joint Chiefs of Staff sa South Korea, gipusil ang mga missile gikan sa palibot sa Pyongyang sa may ala-1:20 sa hapon. Niingon usab ang coast guard sa Japan nga duna silay na-detect nga gituohang missile nga natagak sa dagat, apan lapas na kini sa ilang exclusive economic zone.
Dugay na nga nagpahigayon og mga test-launch ang North Korea sa nagkalain-laing ballistic ug cruise missiles sa tinguha nga makahimo og mga nuclear weapons, ug nagpabilin nga gipahamtang kanila ang UN Security Council sanctions sukad pa niadtong 2006.
Gipatuman usab sa US ug South Korea ang ilang tinuig nga mga drill nga depensiba lamang, lakip na ang mga river-crossing exercises gamit ang mga tank ug armored vehicles. Aduna usab 28,500 ka tropa sa US ug mga fighter jet squadrons sa South Korea.
Matod sa North Korea, kini nga mga drill nahisama sa mga “dress rehearsals” alang sa posibleng agresyon batok kanila. Samtang, gipadayon ni US President Donald Trump ang diplomatikong lakang aron subling makig-istorya kang North Korean leader Kim Jong Un.
Photo courtesy: South China Morning Post
