Gitaho sa Department of Energy (DOE) ang padayong paglambo sa electric vehicle (EV) industry sa Pilipinas, base sa monitoring sa ahensya.
Sumala sa datos, niabot na sa halos 400 ka electric vehicle ang narehistro sa Pilipinas, diin ang tanan nakatuman sa mga lagda nga gilatid sa Vehicle Fuel Economy Labeling program (VFELP). Kinadaghanan niini ang mga Battery Electric Vehicles nga niabot na sa halos 200, ug gisundan sa kapin 100 ka Hybrid Electric Vehicles.
Gipaniguro sa DOE ang padayong pagsuporta sa kagamhanan sa industriya. Sa pagkakaron, duna nay kinatibuk-ang 1,511 ka charging points sa nagkalain-laing bahin sa Pilipinas, diin kapin sa 740 niini mga AC charging points.
Gimintinar usab, sumala sa DOE, ang Php23.71 matag kWh nga bayad sa pag-charge sa nahisgutang mga matang sa sakyanan. Base pa sa datos sa ahensya, duna nay kapin sa 250 ka mga operator, supplier, ug service provider sa electric vehicle sa nagkalain-laing dapit sa nasod.
Gilauman nga mas mosaka pa ang gidaghanon sa mga mogamit ug mosulod sa electric vehicle industry samtang anaa sa tunga-tunga sa krisis sa produktong petrolyo tungod sa nagkagrabe nga gubat sa Middle East.
Photo courtesy: Newsbyte.ph
