Nadakpan sa gilusad nga buy-bust operation sa kapulisan ang usa ka drug personality sa Barangay Tologan, Hagonoy, Davao del Sur, niadtong nakalabay nga adlaw.
Gipahigayon ang operasyon sa Municipal Drug Enforcement Unit sa Hagonoy Municipal Police Station uban sa mga sakop sa PDEU ug PIU sa Davao del Sur Police Provincial Office, RID 11, RSOG 11, 1104th Regional Mobile Force Battalion ug 2nd Davao del Sur Provincial Mobile Force Company.
Ang nadakpan nailhan lamang sa alyas “Kirat,” 43-anyos, lalaki ug residente sa Barangay Almendras, Padada, Davao del Sur.
Sumala sa kapulisan, nasikop ang suspek atol sa operasyon batok sa illegal nga droga og karon gitanggong sa detention facility sa Hagonoy Municipal Police Station.
Gihingusgan sa kapulisan ang panawagan ngadto sa publiko nga makigtambayayong sa awtoridad aron mas mapalig-on pa ang kampanya batok sa illegal nga droga ug mapadayon ang kalinaw sa komunidad.
Samtang, sa pagkakaron giandam na usab sa kapulisan ang kaso batok sa suspek tungod sa paglapas sa Republic Act 9165 o ang Comprehensive Dangerous Drugs Act of 2002.
