Nagpasaka si Senador Loren Legarda og duha ka balaodnon sa Senado nga nagtumong sa pagpaubos sa presyo sa mga nag-unang palitonon ug serbisyo, ug pagpalapad sa VAT exemptions sa pagkaon, tambal, ug serbisyong medikal.
Matod pa ni Legarda, tumong niini nga mga balaodnon nga mohatag og dinaliang kahupayan sa mga nakadawat og ubos nga sweldo, ug maseguro nga barato ang inadlaw-adlaw nga panginahanglan ug ang mga life-saving medical care.
Sa Senate Bill No. 1851 o Differentiated Value-Added Tax Rates Act, ibalik sa 10% VAT ang mga produkto ug serbisyo alang sa mga kabus ug middle-class, samtang magpabilin sa 12% VAT ang luxury goods, high-value assets, “sin” products (alkohol, tabako, vaping), environmentally hazardous items, ug premium real estate. Matod sa senadora, ang dual-rate system makapaus-os sa gasto sa kadaghanang Pilipino samtang nagpahamtang og mas taas nga buhis sa mga adunahan alang sa mga luho ug delikadong produkto.
Sa laing bahin, sa Senate Bill No. 1857 o Murang Bilihin at Serbisyong Medikal Act, tumong niini nga tangtangon ang VAT sa mga nag-unang pagkaon, household essentials, basic medical services, over-the-counter nga mga tambal, first-aid supplies, ug limitadong konsumo sa kuryente ug internet alang sa personal, edukasyon, ug komunikasyon.
Sumala ni Legarda, ang pagtakda og limitadong konsumo alang sa VAT exemption magdasig sa responsable ug matipid nga paggamit sa kuryente ug tubig sa mga panimalay.
Photo courtesy:Philippine News Agency
