Nagpagawas og klarong pamahayag ang Land Transportation Office (LTO) mahitungod sa ilang polisiya sa pagpanakop sa mga modified mufflers.
Kini human sa malampusong dayalogo tali ni Senator JV Ejercito ug LTO Chief, Assistant Secretary Markus Lacanilao, aron hatagan og katin-awan ang kabalaka sa mga motorista.
Giklaro sa LTO nga ang ilang operasyon wala gipunting batok sa mga lehitimong mipalit og aftermarket mufflers.
Hinuon, ang target sa pagpanakop mao kadtong naggamit og mga muffler nga “illegally assembled” o kadtong wala ningsubay sa saktong sumbanan sa gobyerno.
Sumala sa maong katin-awan, ang mga muffler nga napalit gikan sa mga authorized dealers, adunay brand, ug ningsubay sa proseso sa Department of Trade and Industry (DTI), giisip nga legal.
Kini tungod kay ang maong mga produkto gidesinyo nga adunay catalytic converters aron masiguro nga dili kini sobra ka saba ug dili makadaot sa kinaiyahan.
Gisiguro sa LTO nga ang mga motorista nga naggamit og legal ug pormal nga napalit nga aftermarket mufflers dili na kinahanglan nga magdala og sertipiko gikan sa manufacturer o assembler. Ang pagpasar sa maong produkto sa sumbanan sa DTI igo na nga ebidensya sa kalidad niini.
Photo Courtesy: MotoPinas.com
