Laing hugna sa ‘mega oil price hike’ ang gipaabot nga motay-og sa bulsa sa mga motorista karon nga semanaha.”
Sumala sa usa ka source gikan sa industriya sa lana, base sa dagan sa upat ka adlaw nga fuel trading sa merkado, gilauman ang dakong pagsaka sa presyo sa lana. Posibleng mosaka ang Diesel gikan sa Php19.00 hangtod Php22.00 matag litro, samtang ang Gasolina gilauman nga mosaka og Php12.00 hangtod Php16.00 matag litro.
Gipasidan-an ang publiko nga mahimo pang mosaka kini sa mas taas nga bahin sa banabana, gumikan sa gilaumang pagsaka sa Mean of Platts Singapore trading niadtong adlaw nga Biyernes.
Ang maong grabeng umento resulta sa tensyon sa Middle East tali sa Estados Unidos, Israel, ug Iran, nga maoy hinungdan sa pagkasira sa Strait of Hormuz—usa ka kritikal nga agianan sa supply sa lana sa tibuok kalibutan.
Kahinumduman nga base sa datos sa Department of Energy (DOE), nakatala na og dako nga umento niining semanaha diin ang Kerosene nisaka og hangtod Php38.50, ang Diesel og kapin Php24.00, ug ang Gasolina og hangtod Php13.00 matag litro.
Tungod sa kabug-at sa maong pagsaka, nagkasabot ang mga oil retailers nga i-stagger o i-anam-anam ang pagpatuman niini aron pagpaminus sa epekto sa ekonomiya.
Photo Courtesy:Philippine News Agency
