Gipagawas na sa Malacañang ang Memorandum Circular No. 114 nga nagmando sa tanang ahensya sa gobyerno nga pahugtan ang pagdaginot sa kuryente ug enerhiya sa ilang mga buhatan.
Ilawom sa kamanduan, gitahasan ang mga ahensya sa national government, apil ang government-owned and controlled corporations (GOCCs), nga magpatuman ug mga lakang aron makunhuran ang paggamit sa kuryente ug gasoline.
Kalakip niini ang pagtakda sa aircon sa 24°C, pagpatay sa mga suga ug mga electronic device kung wala gigamit, paggamit sa virtual meetings, ug paglimita sa official travel nga mahimo rang pagahimoon online.
Gimando ni Pangulong Marcos Jr. ang pagpatuman sa flexible work arrangements, sama sa compressed four-day onsite workweek o work-from-home setup.
Target sa panggamhanan nga mapaubos sa 10% hangtod 20% ang paggamit sa kuryente ug fuel sa mga buhatan sa gobyerno.
Giklaro sa kamanduan, walay apil niini ang serbisyo sa publiko, ilabina sa mga ahensyang naghatag ug mga mahinungdanong serbisyo sa kahimsog sa panlawas, kaluwasan ug emergency response.
Photo Courtesy:wikipedia
