Nag-atubang sa kaso nga graft and corruption si Department of Health Secretary Teodoro Herbosa uban ang tulo pa ka opisyal sa DOH tungod sa giingong bid rigging o manipulasyon sa bidding sa proyekto sa gobyerno.
Sumala sa reklamo nga gisang-at sa Office of the Ombudsman, gipasanginlan si Herbosa kauban sila Brigida Romualdez-Aquino, Allan Tope, ug Glen Matthew Baggao nga naghilabot sa proseso sa pagpalit sa Mobile Primary Care Facilities nga nagkantidad og kapin Php1.8 bilyon.
Gibutyag sa mga nagreklamo nga adunay giingong irregularidad sa terms of reference o technical specifications sa proyekto aron matumong lamang sa pipila ka supplier ang bidding.
Ang kaso nagpasangil nga nalapas ang Republic Act No. 3019 ug Republic Act No. 12009.
Gipangayo usab sa mga complainant nga suspindihon ang mga opisyal samtang ginahimo ang imbestigasyon ug susihon ang tanang dokumento ug komunikasyon nga may kalabotan sa maong proyekto.
Kung mapamatud-an ang alegasyon, mahimo silang mag-atubang og administratibo ug kriminal nga kaso tungod sa paglapas sa balaod batok sa korapsyon sa gobyerno.
Photo Courtesy: Philippine News Agency
