Nagpahigayon og emergency meeting ang lokal nga panggamhanan sa General Luna, Siargao Island, Surigao del Norte, kauban ang Philippine Ports Authority ug uban pang stakeholders kabahin sa kahimtang sa port jetty nga gigamit sa mga turista alang sa mga island hopping operations.
Base sa gihimong assessment sa PPA, gideklarar nga dili na luwas gamiton ang port jetty alang sa mga turista, personnel ug frontliners nga nalambigit sa island hopping activities. Tungod niini, ipasira ang jetty epektibo kagahapong adlawa, Marso 06, 2026, hangtod sa sunod nga pahibalo aron malikayan ang posibleng peligro.
Sumala sa lokal nga panggamhanan, nasabtan nila nga mahimong makaapekto kini sa mga turista ug operator sa turismo, apan gipasabot nga ang kaluwasan sa mga bisita ug mga nagserbisyo sa turismo maoy labing giuna sa mga opisyal.
Aron mapadayon gihapon ang island hopping operations, nagkasabot ang mga ahensya ug boat operators sa pipila ka temporaryong kausaban sa operasyon. Lakip niini ang paghatod sa mga pasahero pinaagi sa gagmayng sakayan gikan sa baybayon padulong sa ilang canter boats o party boats ilabi na kung low tide, nga adunay kasabutan nga bayranan nga ₱30 kada ulo o ₱60 balikan.
Kung high tide, mahimo nga sunduon sa mga canter ug party boats ang mga pasahero sa Boulevard o Seawall area duol sa Municipal Tourism Office, samtang magpadayon gihapon sa kasamtangang lugar ang docking ug dispatching sa gagmayng sakayan.
Gipahibalo usab nga magpadayon ang registration ug pag-isyu sa clearance alang sa island hopping activities sa Convergence Island Hopping Center sama sa naandan.
Sa katapusan, nangayo ang lokal nga gobyerno og kooperasyon ug pagsabot gikan sa mga travel agency, tour operators, boat associations ug tour guides aron masiguro ang kaluwasan, kahapsay ug padayon nga kalamboan sa turismo sa General Luna.
Photo courtesy: General Luna Tourism
