Magpabiling sirado karong weekend ang tanang balaang dapit sa Old City sa silangang Jerusalem tungod sa kabalaka sa seguridad sa ikaunom nga adlaw sa gubat sa Middle East, sumala sa Israeli police.
Lakip sa mga dapit nga sirado ang Western Wall, Al-Aqsa Mosque, Temple Mount Complex ug Church of the Holy Sepulchre. Dili tugotan ang pagsulod sa mga deboto ug bisita bisan unsang relihiyon aron mapanalipdan ang kaluwasan sa publiko.
Samtang niini, gihupayan sa Israel ang pipila ka restriksyon ug gitugotan ang limitadong pagtigom sa publiko hangtod 50 ka tawo basta duol sa mga shelter. Gitugotan usab ang pipila ka mga lugar-trabahuan nga magbukas, apan magpabiling sirado ang mga eskwelahan.
Ang pagsirado sa mga balaang dapit natunong usab sa bulan sa Ramadan diin kasagarang daghang Muslim ang mag-ampo sa Al-Aqsa Mosque matag Biyernes.
Samtang nagpadayon ang tensyon, mikabat na sa 10 ka tawo sa Israel ang namatay sa missile strikes sa Iran isip balos sa pag-atake sa Israel.
Photo Courtesy: Orthodox Christianity
