Nadiskubrehan ang wala mailhing lawas sa usa ka lalaki sa baybayon sa Purok 7, Barangay Balasinon, Sulop, Davao del Sur.
Sumala sa Sulop Municipal Police Station, nakadawat sila og tawag gikan sa usa ka concerned citizen nga gipasa ni Barangay Captain Rosalie Deduyo nga nangayo og tabang sa kapulisan human makita ang patay’ng lawas nga naanod sa daplin sa dagat.
Sa inisyal nga imbestigasyon, giingon sa pipila ka mga mangingisda nga una nilang namatikdan ang usa ka sako nga naglutaw sa kadagatan apan ilang gipasagdan tungod kay ilang giisip nga basura lamang. Tungod sa kusog nga agos sa dagat, naanod kini padulong sa baybayon ug napadpad sa mangrove area diin kini nadiskubre sa usa ka residente nga nanginhas og kabibe ug talaba.
Sa pag-abot sa kapulisan sa lugar, ilang nasuta nga ang lawas sa biktima walay sapot, giputos og puti nga packaging tape ang ulo, ug putol ang duha ka bukton samtang nakita usab ang grabe nga samad sa kalawasan sa biktima.
Gihangyo sa Sulop Municipal Police Station ang tabang sa Davao del Sur Provincial Forensic Unit o SOCO aron magpahigayon og forensic examination sa lugar. Samtang ang lawas sa biktima gidala na sa Funeral Homes sa Sulop alang sa post-mortem examination, ug padayon pa ang imbestigasyon aron mailhan ang biktima ug matino ang tinuod nga nahitabo sa maong insidente.
