Gisuspenso sa Ombudsman sulod sa unom ka bulan nga walay sweldo ang walo ka opisyal sa Department of Public Works and Highways o DPWH, human nigawas ang reklamo kalabot sa mga proyekto sa flood control sa Surigao del Norte, nga gikatahong gibayran na sa kinatibuk-an bisan wala pa kini mahuman.
Base sa gipagawas nga mando sa Ombudsman ning adlawa, Miyerkules, Nobyembre 04, 2026, pito niini mga engineers ug usa ka accountant nga nadestino sa DPWH Regional Office XI ug Surigao del Norte First District Engineering Office.
Lakip sa gisuspenso si District Engineer Annie Dela Vega, kauban ang ubang engineers nga sila Federico Gotico III, Demilyn Castrence, Quintinano Armendariz Jr., Edward Tinio, Florencio Sulana ug Ricky Arciga, ingon man ang accountant nga si Jerome Sulapas.
Gipasabot sa Ombudsman nga ang maong preventive suspension gihimo samtang gihulat ang resolusyon sa mga kasong conduct prejudicial to the best interest of the service, grave misconduct ug serious dishonesty.
Sumala pa sa reklamo, adunay mga proyekto sa flood control nga wala pa mahuman apan gibayaran na sa DPWH sa kinatibuk-an, nga giisip nga posibleng makadaot sa pundo sa gobyerno.
Gibutyag usab sa Ombudsman nga adunay igong basehan ang pagpahamtang og preventive suspension, subay sa mga ebidensiyang gisumiter sa nagreklamo.
Apan, ang maong suspensiyon wala pa nagpasabot nga napamatud-an na nga sad-an ang mga opisyal, samtang nagpadayon pa ang proseso sa pagresolba sa mga kaso.
Photo courtesy: DPWH Surigao del Norte 1st DEO – BAC
