Gipahigayon sa Lokal nga Kagamhanan sa Asuncion, pinaagi sa Municipal Health Office (MHO) ug sa koordinasyon sa Department of Health (DOH), ang Local Health Board Meeting niadtong nakalabay nga adlaw sa MGSO Conference Room.
Gipangunahan ni Municipal Mayor Atty. Rosario R. Dayaday ang maong tigom diin gihisgutan sa mga miyembro sa Local Health Board ang tulo ka gisugyot nga lakang sa lehislasyon nga may kalabotan sa mga serbisyo ug polisiya sa panglawas sa lungsod.
Lakip niini ang gisugyot nga ordinansa alang sa pagtukod sa Asuncion Municipal Health Office TB-DOTS Clinic ug mga giya sa pagdumala sa benepisyo niini ubos sa Philippine Health Insurance Corporation (PhilHealth).
Gihisgutan usab ang resolusyon alang sa pagsagop ug pag-apruba sa Constitution and By-Laws sa Asuncion Federation of Barangay Health Workers, ingon man ang gisugyot nga ordinansa nga giduso ni Hon. Alvin Palma nga nagdili sa paglubong o pag-inter sa mga patayng lawas gawas sa opisyal nga gitudlong sementeryo, memorial park ug awtorisadong lubnganan sulod sa lungsod, lakip ang mga silot sa mga molapas niini.
Pinaagi sa maong tigom, gipadayon sa LGU Asuncion ug DOH ang ilang panagtambayayong sa pagpalig-on sa mga programa ug serbisyo sa panglawas, pagpatuman sa mga polisiya ug pagpalapad sa kahigayonan sa katawhan nga makadawat og dekalidad nga serbisyong medikal, ilabina sa lebel sa barangay.
Photo Courtesy: Municipality of Asuncion
