Nakuha ni Pres. Donald Trump ang rekord ang pinakataas nga State of the Union address sa kasaysayan sa Estados Unidos, nga miabot og 1 oras ug 50 minutos — milabaw sa naunang rekord nga gihuptan ni Bill Clinton sa iyang katapusang pagpamulong niadtong 2000.
Sa iyang taas nga pakigpulong sa joint session sa Kongreso, balik-balik nga gipasigarbo ni Trump ang iyang economic agenda, nga iyang gihulagway isip usa ka “turnaround for the ages” sulod sa iyang unang tuig pagbalik sa White House alang sa ikaduhang termino. Gipasiugda niya ang pagkunhod sa inflation, pagtaas sa job creation, ug pagpalig-on sa domestic manufacturing isip mga timaan sa kalampusan sa iyang administrasyon.
Mahitungod sa Iran, gibutyag sa presidente nga ang iyang “preference mao ang pagsulbad sa problema pinaagi sa diplomasya,” apan gipasidan-an niya ang Iran batok sa pagpadayon sa nuclear weapons program. Miingon siya nga andam ang Estados Unidos sa paglihok kon adunay hulga sa seguridad sa rehiyon.
Sa tunga-tunga sa pagpamulong, nakiglalis si Trump sa mga miyembro sa Democratic Party nga anaa sa audience sa makadaghang higayon, ilabina sa mga isyu sa ekonomiya ug immigration. Bisan pa niini, wala niya direktang gibadlong ang mga mahistrado sa Supreme Court of the United States nga mitambong, kabahin sa ilang bag-ong ruling nga may kalabutan sa mga taripa.
Ang tubag sa Democrats gipangunahan ni Abigail Spanberger, gobernador sa Virginia, nga mitudlo nga kulang sa konkretong solusyon ang administrasyon sa nag-unang mga hagit sa nasod. Matud pa niya, “ang nasod nagkinahanglan og tin-aw nga plano, dili puro saad.”
Ang taas nga pagpamulong sa presidente miabot samtang nagpakita ang pipila ka mga survey nga nagkaluya ang suporta sa pipila ka sektor sa publiko sa iyang second-term agenda, samtang nagkaduol ang importante nga midterm elections karong Nobyembre.
Padayon nga gihisgutan sa mga political analyst ang epekto sa maong State of the Union address sa umaabot nga eleksyon ug sa direksyon sa polisiya sa Estados Unidos.
Photo Courtesy: Arkansas Advocate
