Nagtuo si kanhi International Criminal Court (ICC) Judge Raul Pangalangan nga igo na ang mga ebidensyang gipresentar sa prosekusyon aron mapahamtangan og silot (i-convict) si kanhi presidente Rodrigo Duterte.
Matod sa kanhi maghuhukom ug kanhi dean sa U.P. College of Law, lig-on ang mga ebidensya nga gipakita sa prosekusyon sa unang adlaw sa hearing, ug igo na kini aron makombinsir ang mga huwes sa ICC.
Sa wala pa nagsugod ang pagdungog, gidahom niya nga ipresentar sa panel ang ilang mga testigo aron ipakita ang merito sa ilang kaso. Apan imbes nga testigo, giisa-isa matod pa sa mga prosecutor ang pipila ka ‘specific details’ sa mga kasong giakusar batok kang Duterte, lakip na ang mga video clip nga nagpakita sa mga kontrobersyal nga pamahayag sa kanhi pangulo kaniadto.
Wala usab gisalikway sa kanhi ICC judge ang posibilidad nga giandam ug gitigom pa sa panel ang ilang ‘strongest evidence’ o labing lig-on nga ebidensya alang sa trial proper, kung pananglitan mouswag ang kaso gikan sa confirmation stage.
Lakip sa mga gipresentar sa panel sa unang adlaw sa confirmation hearing sa kanhi pangulo ang mga video diin giangkon niini ang pipila ka pagpatay, ug uban pang kontrobersyal nga kamatuoran sa kasagsagan sa kampanya batok sa ilegal nga druga.
Sa pamahayag usab ni Julian Nicholls, ang senior trial lawyer sa Office of the Prosecutor, panahon sa pagdungog, giingon niya nga lig-on ang gihuptan nga ebidensya sa prosekusyon ug dako ang posibilidad nga ma-convict ang kanhi pangulo kung modesisyon ang mga huwes nga ipadayon kini ngadto sa usa ka full trial.
Photo courtesy: Senate of the Philippines
