Ipatuman sa Philippine Statistics Authority ang mas strikto nga mga requirements alang sa late nga birth registrations, kini aron malikayan anga mag posibleng pag-abuso sama sa gituohang maoy nahitabo sa kaso ni Bamban Mayor, Alice Guo. Ang late registration mao ang pagparehistro sa kapin 30 ka adlaw gikan sa pagpanganak.
Gisaysay ni Assistant National Statistician Engineer Marizza Grande sa hearing sa Senate Committee on Justice and Human Rights nga adunay joint memorandum circular sa 2021 ang Department of the Interior and Local Government (DILG ) bahin sa proseso sa delayed registration. Sa bag-ong requirements karon, kinahanglan na ang barangay certificate, uban pang dokumento sama sa birth certificate o passport sa ginikanan kung taga laing nasud, ug kinahanglan napud nga personal nga magpakita ang registrant kung hamtong na ang panuigon. Kinahanglan usab nga mag-enroll sa national ID aron makuha ang biometric data ug litrato sa registrant, lakip ang identification sa ginikanan.
Dugang ni Grande nga sa 2023, 1.3 milyon ang nakarehistro sa saktong panahon samtang kapin 1 milyon usab ang late registrants. Sumala sa 2020 census, 96.6% sa mga Pilipino adunay birth certificates samtang 3.6 milyon ang wala pa marehistro.
Gisugdan usab sa PSA ang Birth Registration Assistance Project niadtong Pebrero 2022, nga nakarehistro na og 480,000 katawo gikan sa target nga 2 milyon ka indibidwal. Gisupportahan usab sa PSA ang pormal nga pagpatuman sa barangay civil registry system ug ang pag-develop sa electronic Civil Registration and Vital Statistics system (eCRVS).
Photo Courtesy: Manila Bulletin
