Palig-onon sa Philippine National Police (PNP) ang information drive batok sa pagpamaligya og mga smuggled ug ilegal nga sigarilyo sa mga sari-sari store sa tibuok nasod.
Gimandoan ni PNP Chief Jose Melencio Nartatez Jr. ang tanang hepe sa pulisya nga makig-alayon sa mga lokal ug opisyal sa barangay aron pakusgan ang kampanya sa pagpakaylap sa impormasyon, human sa mga report nga kaylap ang baligyaay og smuggled cigarettes sa mga gagmayng tindahan.
Matod ni Nartatez, kinahanglan masabtan sa mga tag-iya og gagmayng tindahan nga nahimo silang kabahin sa supply network sa mga sindikato kon mosugot sila nga mobaligya sa mga illegal nga produkto.
Lakip sa information drive ang pag-ila sa mga brand sa smuggled ug ilegal nga sigarilyo aron mahimong giya sa mga tindero ug sa mga mamalitay.
Mahinumduman nga una nang nagmando si Interior Secretary Junvic Remulla nga mopahigayon ang mga awtoridad og mga raid sa mga publikong merkado ug gagmayng retailer isip kabahin sa kampanya batok sa ilegal nga sigarilyo. May kalabotan niini, gihatagan og usa ka semana nga lugway ang mga namaligya aron hunongon ang distribusyon ug mahurot ang ilang mga tinda sa dili pa sugdan ang mas estrikto nga operasyon.
Sa laing bahin, nanawagan ang PNP sa publiko, ilabi na sa mga gagmayng tindahan, nga makigtambayayong ug daling isumbong sa mga awtoridad ang bisan unsang impormasyon bahin sa baligyaay og mga smuggled nga sigarilyo sa ilang dapit.
Photo courtesy: WIKIPEDIA
