Nakatakda nga depensahan ni Mario Barrios ang iyang World Boxing Council (WBC) welterweight title karong Sabado batok sa social media personality nga si Ryan Garcia.
Atubangon ni Barrios (29-2-2) si Garcia, kinsa giila usab nga usa sa mga talentadong boksingero apan nahimong kontrobersyal sa miaging tulo ka tuig tungod sa suspensyon, kaso, ug uban pang mga isyu.
Bisan pa man og siya ang kampiyon, giisip nga underdog si Barrios batok kang Garcia (24-2). Sa edad nga 27, giingon nga mosulod pa lang si Garcia sa iyang prime, ug ang kadaogan batok kang Barrios mohatag kaniya sa WBC belt ug posibleng makapausab sa iyang imahe human sa sunod-sunod nga kontrobersiya.
Niadtong Abril 2024, gipakanaog ni Garcia si Devin Haney sa ring sa katulo ka higayon ug nidaog pinaagi sa majority decision, apan sa ulahi gideklarar kini nga no contest human siya nagpositibo sa performance-enhancing drugs.
Gisuspinde siya sa New York State Athletic Commission og usa ka tuig, gipamulta, ug gipabalik ang $1 million nga kinitaan sa nahisgutang away.
Nadakpan usab siya niadtong Hunyo 2024 tungod sa giingong pagpangdaot sa usa ka hotel sa Beverly Hills, apan sa ulahi gibasura ang kaso. Gipapahawa usab siya sa WBC niadtong Hulyo 2024 human nigamit og mga racial slur sa usa ka livestream, apan gibalik ang iyang status niadtong Nobyembre.
Bisan pa niini, nagpabiling kalmado si Garcia sa mga press conference ug gipaambit ang iyang pagbalik ubos sa pagbansay sa iyang amahan nga si Henry Garcia.
Photo courtesy: espn.ph
