Sa balita nag makatawa ka, usa ka online shopping giant sa China ang nakahunahuna og promo nga baliktad sa kasagaran — dili cellphone ang paliton aron naay case, kundili case ang paliton aron naay libre nga cellphone.
Gipahibalo sa e-commerce platform nga JD.com ang ilang limited edition nga gold-plated iPhone cases nga gihimo sa halos purong bulawan.
Ang ilang pinakamabug-at nga case moabot og 100 gramos nga bulawan ug presyong halos katumbas na sa sakyanan. Apan aron mas ganahan ang mopalit, libre na sab matod ang bag-ong flagship phone sa Apple kung mopalit ka sa maong case.
Sa laing pagkasulti, kung dato ka, dili cellphone ang paliton bulawan ang paliton, bonus na lang ang cellphone.
Bisan pa niini, adunay gamayng problema: tungod sa kabaga sa bulawan, usahay dili na moandar ang wireless charging ug posible pa nga mo-init ang phone.
Sa karon, wala pa klaro kung adunay naka-gasto og milyon para sa pinakabug-at nga case, apan ang mas magaan nga bersyon kuno sold-out na ug daghang netizens ang nag-post sa ilang “bulawanong proteksyon” sa cellphone.
Sa panahon nga ang uban nangita og paagi makapalit og cellphone, adunay uban nga cellphone ang libre basta kaya lang nimo paliton ang bulawan.
Photo courtesy: Oddity Central
