Gisugdan na sa Dakbayan sa Sugbo ang pagpangandam alang sa ika-89 Charter Day karong Pebrero 24, 2026, nga saulogon pinaagi sa nagkadaiyang kalihokan nga magpasiugda sa kasaysayan ug kalamboan sa syudad.
Sumala ni Cebu City Mayor Nestor Archival, Sr., gihimo ang selebrasyon aron ipahinumdom ang kahinungdanon sa petsa diin nadawat sa syudad ang charter niadtong Pebrero 24, 1937, nga karon gimarkahan isip special non-working holiday sa lokalidad.
Lakip sa kalihokan ang photo exhibit nga giulohan og “History of Charter” nga gipahigayon niadtong Pebrero 20 samtang sa samang adlaw sab gihimo ang PRAISE Program diin gipasidunggan ang mga talagsaong mga public servants sa kagamhanan.
Sa mismong Charter Day, aduna’y wreath-laying ceremony sa Plaza Sugbo nga gilaoman nga tambongan sa mga kanhi mayor lakip sila Michael Rama ug Raymond Alvin Garcia.
Sa gabii, ipadayon ang selebrasyon pinaagi sa testimonial dinner ug awarding rites alang sa Outstanding Individuals, Institutions, ug Mayor’s Special Awardees.
Gibutyag sa mayor nga mikabat sa kapin Php3.5 milyon ang gigahin nga pondo alang sa tanang kalihokan isip pagtimaan sa anibersaryo sa pagkatukod sa syudad.
