Gisaka na ni U.S. President Donald Trump ngadto sa 15% ang global duty sa mga produkto nga gi-import sa Estados Unidos, usa ka adlaw human gideklarar sa U.S. Supreme Court nga ilegal ang dako nga bahin sa iyang tariff program.
Sa iyang Truth Social platform, miingon si Trump nga human sa usa ka “thorough review” sa desisyon sa Korte Suprema nga iyang gitawag og “extraordinarily anti-American,” isaka sa administrasyon ang import levies ngadto sa “fully allowed, and legally tested, 15% level.”
Una nang nag-anunsyo si Trump og 10% nga taripa human sa desisyon sa korte. Dugang pa niya, sa mosunod nga mga bulan, mangita ang iyang administrasyon og uban pang “legally permissible” nga pamaagi aron magpatuman og dugang nga taripa.
Sumala sa White House, temporaryo lamang kining bag-ong 15% duty ug mahimo kining ipatuman hangtod sa 150 ka adlaw.
Aduna gihapoy mga exemption alang sa pipila ka sektor nga ubos sa managlahing imbestigasyon, lakip na ang pharmaceutical products ug mga baligya nga sakop sa US-Mexico-Canada trade agreement.
Kini nga lakang ang pinakabag-o nga yugto sa nag usab-usab nga polisiya sa taripa sa administrasyong Trump, diin sa miaging tuig, kapila na gitala, giusab, o gibakwi ang nagkalain-laing lebel sa buhis sa mga produkto nga gina-import sa U.S.
Niadtong Biyernes, sa botos nga 6-3, nakahukom ang conservative-majority nga Supreme Court nga ang balaod niadtong 1977 nga gigamit ni Trump aron magpahamtang og kalit nga taripa sa pipila ka nasod wala naghatag og awtoridad sa presidente sa paghimo sa lakang.
Grabeng gisaway ni Trump ang desisyon, ug miingon nga siya “na-ulaw” (ashamed) sa pipila ka miyembro sa korte, bisan pa og duha sa mga mahistrado siya mismo ang nagtudlo.
Photo courtesy: Leah Millis/Reuters
