Nangusog na karon ang Kamara sa Kongreso nga maduso na ang Anti Political Dynasty Bill tungod sa tingog sa masa.
Gipasabot ni Deputy Speaker Bambi Emano nga gatuyok sila sa tibook nasud ug gibisita ang mga dagko nga syudad aron madungog ang mga opinion ug inputs sa mga stakeholder’s aron makamugna og lig-on nga balaod batok kontra dinastiya. Dugang pa nga e-konsidera nila ang mga gihatag nga mga impormasyon sa mga katawhan ilabina sa mga kabataan.
Mahinumdoman nga ni bisita sa Xavier University ug USTP ang mga Senador ug Kongresista alang sa public consultation sa hisgitunan nga Anti Political Dynasty bill.
Sa pikas bahin, nagatoo sab si Gabriela Womens Party Representative Sara Elago nga ang pagbatok sa pagtunhay sa political dynasty, pagbatok sab sa sistematiko nga korapsyon sa nasud.
Saysay pa ni Elago nga dili sayon ug walay dali nga pamaagi sa pagputol sa nakagamot na nga problema sa korapsyon apan ang pagpasa sa Anti-Political Dynasty Bill ang usa sa iyahang nakita nga mamahimong sinugdanan sa pagpakgang sa nag-unang himan sa pagkaylap sa korapsyon nga mga political dynasty.
Giklaro sab sa Kongresista nga ang ginaduso nga Anti-Political Dynasty Bill dili pagputol sa maayong pagpanerbisyo sa usa ka pangalan o apelyido sa politika apan pag-abli o paghatag og katungod sa tanan nga adunay access sa pagpanerbisyo sa publiko subay na sab sa konstitusyon.
