Gibana-bana nga mohalin og kapin Php912 milyon ang National Food Authority sa pag-auction sa daan nga mga rice stocks diin pila na ka bulan ang pagtipig. Sumala sa NFA, i-auction ang 754,000 ka sako nga bugas aron maluag ang bodega ug aron dili kini madaot.
Matod ni Larry Lacson, administrator sa National Food Authority, ginabuhat ang pag-auction subay sa mandato sa balaod aron dili madaot ang mga stock. Ang pag-abli sa mga bid itakda sa Pebrero 20 sa NFA Central Office, samtang ang pre-auction conference himuon karung Pebrero 13. Gisiguro niini nga ang mga bugas nga i-auction miagi sa laboratory test ug luwas pa nga kaonon.
Ang matigom nga kita gamiton alang sa operational expenses sama sa sweldo sa mga empleyado, pagpalambo sa transportasyon, pagpalit og sako, ug pagpalit usab og mga trak aron mapalapdan ang pagpamalit og palay. Gitugotan ang bisan kinsang indibidwal o kompanya nga adunay kompletong dokumento nga moapil sa bidding.
Ang minimum nga bid mao ang 5,000 ka sako, ug magkalahi ang presyo depende sa kadugayon sa bugas. Ang mga stock nga tulo hangtod unom ka bulan ang pagkatipig presyuhan og Php25.16 matag kilo, samtang ang sobra 18 ka bulan ibaligya og Php22.52 matag kilo. Ang mga dili mahalin i-auction pag-usab human una ihanyag sa mga local government units, ahensya sa gobyerno, ug government-owned and controlled corporations.
Photo Courtesy: NFA
