Arestado ang usa ka ginang, anaa sa 50-anyos ang panuigon, human madiskubre ang duha ka patayng masuso sulod sa freezer sa usa ka balay sa France. Nadakpan ang babaye sa Boulogne-Billancourt sa Paris, human kini gidudahan nga may kalabutan sa maong insidente.
Nasuta ang mga lawas sa mga masuso dihang mitaho sa pulis ang usa ka lalaki niadtong Martes human niya makit-an ang usa ka patayng bata sulod sa freezer sa ilang balay sa lungsod sa Aillevillers-et-Lyaumont. Pag-abot sa mga awtoridad, nadiskubre pa ang ikaduhang lawas sa lain pang masuso. Human niini, Person-of-Interest ang inahan nga kalit lang nilayas sa iyang balay nga walay pahibalo.
Dili kini ang unang susamang kaso sa France. Niadtong tuig 2022, duha usab ka patayng masuso ang nakit-an sa freezer sa habagatang bahin sa nasod. Niadtong 2015, lima ka lawas sa mga masuso ang nadiskubre sa laing insidente nga misangpot sa pagkapriso sa inahan sulod sa walo ka tuig, ug laing kaso diin nahukman ang inahan og walo ka tuig nga pagkapriso niadtong 2009 tungod sa pagpatay sa tulo ka bag-ong natawo niya nga anak.
Photo Courtesy: CTV News
