Nagkataas ang kaso sa teenage pregnancy sa mga batang ubos 15-anyos sa Pilipinas bisan pa nga mikunhod ang gidaghanon sa mga nagmabdos nga edad 15 hangtod 19-anyos. Base sa datos nga gigamit sa Commission on Population and Development, mikunhod ang porsiyento sa mga babayeng 15–19 anyos nga nanganak gikan 8.6 porsiyento niadtong 2017 ngadto sa 5.4 porsiyento niadtong 2022. Apan sa laing bahin, misaka ang live births sa mga batang babaye nga 10–14 anyos gikan 2,411 niadtong 2019 ngadto sa 3,343 niadtong 2023 sumala sa Philippine Statistics Authority.
Sumala kang Lisa Grace Bersales, undersecretary sa Commission on Population and Development, walay panagsumpaki sa maong datos tungod kay ang pagkunhod naa sa mas tigulang nga grupo samtang ang pagsaka naa sa labing batan-ong edad. Iyang gihulagway nga makapabalaka ang pagsaka sa kaso sa ubos 15-anyos ug nagkinahanglan kini og dali nga pagtagad. Matud pa niya, bisan mga 2 porsyento lamang sa tanang rehistradong pagpanganak ang teenage pregnancies, nagpasabot gihapon kini nga kulang ang proteksyon alang sa mga kabatan-onan.
Gipasabot usab nga usa sa mga hinungdan mao ang mas sayong exposure sa kabatan-onan sa digital media ug social media. Dugang pa nga kinahanglan ang panaghiusa sa pamilya, eskwelahan, lokal nga panggamhanan ug civil society aron matubag ang problema. Gipadayag usab nga limitado ang diskusyon sa ubang eskwelahan bahin sa reproductive health, ug adunay mga magtutudlo nga naglisod pagtudlo niini, busa gihingusgan karun ang mas komprehensibong edukasyon ug hustong training alang sa mga magtutudlo.
Photo Courtesy: KJK Hospital
