Gikonsidera ni City Councilor Roger Abaday nga wake-up call sa tanang lokal nga panggamhanan ang bag-ohay lang nasinating bangis ni Bagyong Basyang aron nga mohimo og mga lakang sa pagpalambo ug pagpakusog sa pagpangandam sa mosunod nga mga kalamidad.
Sa regular nga sesyon, gipunting ni Konsehal Abaday ang daghang mga rason nga nagpasamot sa epekto sa mga bagyo nga sagad hinimuan sa mga tao sama nalang sa pag-abuso ug walay pagpakabana sa kinaiyahan.
Daghan ang gisugyot sa konsehal nga makatabang sa pagpakusog sa disaster preparedness sa mga komunidad, sama nalang early warning system, sirena nga moalerto sa katawhan higayon nga mosaka ang tubig sa kasubaan, istriktong pagpatuman sa preemptive evacuations, paglunsad og mga trainings o drills ug daghan pa.
Dugang sugyot ni Konsehal Abaday ang paghangyo sa City Planning Office nga marepaso o ma-review ang zoning ordinance map aron nga malikayan ang pag-isyu og building permit sa mga lugar nga ginakonsiderang danger zone.
Kini labi na daghang barangay sa syudad ang taas ang risgo sa mga pagdahili sa yuta ug mga lugar nga dili na dapat puy-an sa mga tao tungod sa kadelikado.
