Gisugdan na kagahapong adlawa Pebrero 10, ang paglunsad sa West Philippine Sea (WPS) Mural Festival 2026 sa Bonifacio Global City (BGC), Taguig, isip kabahin sa selebrasyon sa National Arts Month.
Ang maong festival nagtumong sa paggamit sa arte ug sining isip plataporma sa pagpahayag sa kamatuoran sa West Philippine Sea sa kinabuhi, kultura, ug soberanya sa nasod. Una kining gipaila niadtong Pebrero 1 sa Rizal Park, Maynila, ug karon gipalapdan na ngadto sa mga sentro sa komersyo aron mas daghan ang mahatagan og kahibalo.
Gipangulohan kini sa mga artist collectives ug mga grupo sa komunidad, uban sa suporta gikan sa National Commission for Culture and the Arts (NCCA) ug sa Philippine Coast Guard (PCG). Ang mga mural nga pagahimoon magsilbing “visual frontline” o makitang simbolo sa adbokasiya sa mga Pilipino sa ilang katungod sa dagat.
Matod pa ni filmmaker Baby Ruth Villarama, ang maong festival maoy sumpay sa iyang award-winning documentary nga “Food Delivery: Fresh from the West Philippine Sea,” nga nagpakita kon unsa ka importante ang maong dagat sa identidad sa mga Pilipino.
Gipaabot nga dagsaon ang kalihukan sa mga inilang pintor, kabatan-onan, ug mga boluntaryo aron dungan nga mopinta og mga obra nga nagpakita sa bahandi sa dagat, kasaysayan, ug ang pakigbisog sa mga mangingisdang Pilipino.
Mitambong sa maong okasyon sila si Commodore Jay Tarriela, retired Justice Antonio Carpio, ug uban pang mga opisyal nga nagsuporta sa kawsa. Human sa Taguig, gikatakdang dad-on ang mural festival sa nagkalain-laing rehiyon sa Pilipinas aron mapalig-on ang maritime heritage ug nasyonalismo.
Photo Courtesy: Trending News PH
