Patay ang labing menos 14 ka tawo human sa pagkahugmak sa duha ka nagtapad nga residential building sa syudad sa Tripoli, Lebanon, niadtong Domingo. Ang insidente nahitabo sa Bab al-Tabbaneh nga lugar sa amihanan sa maong nasud.
Nisaka ang ihap sa mga namatay gikan sa una nga unom ngadto sa 14 human matapos ang search and rescue operations, base sa impormasyon sa Lebanon National News Agency base sa datos sa civil defense. Ang duha ka building giingong gipuy-an sa daghang residente sa wala pa kini nahugno.
Nakuha sa mga rescue team ang 14 ka patayng lawas samtang walo ka tawo ang naluwas ug nadala sa ospital, sumala sa civil defense sa Lebanon. Padayon nga gisubay ang kahimtang sa mga naluwas human sa insidente.
Nagpadayon ang koordinasyon sa lokal nga kagamhanan ug rescue units sa maong lugar alang sa dugang nga pag-imbestiga sa nahitabo.
Photo Courtesy: Reuters
