Giduso sa Department of the Interior and Local Government (DILG) ang pagdili sa paggamit sa mga sakyanan nga gipanag-iyahan sa gobyerno panahon sa weekends ug holidays, gawas kung kini direkta nga nalambigit sa opisyal nga trabaho, sumala sa Memorandum Circular No. 2026-011 nga gipetsahan ug Pebrero 6.
Sumala sa DILG, “Ang mga sakyanan sa gobyerno gihatag lamang aron masiguro ang episyente ug epektibo nga paghatod sa serbisyo publiko. Ang paggamit niini usa ka pribilehiyo nga gipasukad sa pagsalig sa publiko.”
Ilang gidugang nga ang dili awtorisado nga paggamit, ilabina alang sa personal nga rason, usa ka kalapasan sa mga sumbanan sa tulubagon (accountability) ug integridad.
Sakop sa polisiya ang tanang opisyal ug empleyado sa probinsya, syudad, munisipyo, ug barangay, lakip na ang mga personahe sa DILG, PNP, Bureau of Fire Protection, ug Bureau of Jail Management and Penology.
Gihisgotan sa circular ang 1987 Constitution, RA 6713, Administrative Code of 1987, ug Administrative Order No. 239 nga nagmando nga ang mga sakyanan sa gobyerno gamiton lamang alang sa opisyal nga katuyoan. Gimandoan ang tanang ulo sa ahensya ug opisina nga ipakatap ang polisiya ug sigurohon ang bug-os nga pagtuman (full compliance).
Gipahimangnoan usab sa DILG nga mahimong mag-atubang ug administratibo o kriminal nga mga kaso ang mga makalapas sa regulasyon.
Photo courtesy: DILG Philippines
