Nahulog nga wala nay kumpyansa ug pagsalig ang katawhan sa pagdumala sa gobyerno ug sa mga napiling politiko.
Kini human migawas sa gihimong survey sa OCTA Research nga anaa na lang sa tulo sa matag napulo ka Pilipino ang nagtuo nga gipaminaw sila ug gihatagag bili ang ilang panglantaw sa mga magbabalaod ug lokal nga opisyal.
Base usab kini sa migawas sa Tugon ng Masa Survey sa OCTA Research diin 31 porsyento ang nag-ingon nga gihatagan sila og bili sa mga napiling opisyal. Mayoriya o kapin sa 61 porsyento ang nag-ingon nga dili, ug 9 porsyento ang wala mitubag o undecided.
Base sa survey, gipangutana ang mga respondent kung sa ilang huna-huna gipabilhan ba sa mga opisyal nga ilang giboto ang ilang mga gihuna-huna o panglantaw.
Nagpakita kini og dako nga gintang tali sa mga opisyal ug sa mga ordinaryong lungsoranon diin dili mabati sa publiko ang mga ginabuhat sa Kongreso sa ilang adlaw-adlaw nga kinabuhi, matod pa sa OCTA.
Migawas usab nga 55 porsyento o mayoriya sa mga respondents ang nag-ingon nga nagasalig pa gihapon sila sa nasudnong gobyerno sa pagtubag sa mga suliranin sa nasod. Samtang 20 porsyento sa mga gipangutana ang walay salig, ug 25 porsyento ang undecided.
Matod sa OCTA, hagit kini ilabi na kay dili lamang ang kumpyansa sa publiko ug epektibong pagdumala ang gikinahanglan sa mga opisyal, kundi ang makita usab sa katawhan nga gipaminaw ug gipabilhan sila sa mga nakalingkod sa pwesto.
Gihimo ang survey nationwide niadtong Disyembre 3-11 sa miaging tuig sa 1,200 ka adult respondents pinaagi sa face-to-face interviews.
Photo courtesy: Octa Research/ Facebook
