Nagpabiling dakong hagit sa mga kabus nga pamilya nga adunay mga anak nga anaay kondisyon nga autism spectrum disorder kon ASD ang pagsagubang sa mahal nga assessment labi na sa kamahal sa treatment.
Sa nilabayng regular nga sesyon, unod sa special report ni Konsehal Desiree Ann Dahino ang reyalidad nga ginaatubang sa mga kabataan nga adunay autism ug sakripisyo sa ilahang mga pamilya.
Saysay sa konsehal, common na ang autism, apan dili kini makita sa mga numero ug datus tungod ang kamatuoran daghan pang mga bata nga wala na-diagnose ug wala naka-agi og assessment tungod sa kamahal magpakonsulta.
Sa assessment palang daan, mokabat na sa singko mil pataas, labaw na ang gikinahanglang therapy nga mokantidad sa nuebe sinto ngadto sa dos mil pesos matag session. Aron mahimong epektibo ang therapy, labing maayo nga ipahigayon kini, matag adlaw o tulo ka beses matag semana.
Dugang pa sa Konsehal, daghan ang kabataan karon nga klaro na nga adunay senyales sa autism sama sa dili makaistorya, adunay repetitive behavior, walay social skills, sobra nga tantrums, dili makataan-aw sa mata ug uban pa. Apan tungod sa kawad-on ug kawalay suporta, inay ipakonsulta ang ilang mga anak, unahon nalang nila ang pangkaon aron nga makalahutay sa pang-adlaw-adlaw.
Tungod niini nga reyalidad, gihangyo ni Konsehal Dahino ang konseho pagmugna og programa nga mosuporta ug mohatag og pagtagad sa mga Kabataang anaa sa spectrum sama nalang sa libre o subsidies nga diagnosis sa autism.
Photo courtesy: Cagayan de Oro City Council
