Giangkon sa World Health Organization (WHO) nga nagpabiling huyang ug dili patas ang pag-uswag sa tibuok kalibotan sa pagpangandam batok sa pandemya, ilabi na padayong gihisgotan ang pundo sa pipila ka nasod alang sa Defense Security.
Sa ikaunom nga tuig sukad gideklarar ang COVID-19 isip usa ka global health emergency, gipasiugda sa WHO nga aduna nay mga lakang nga gihimo sama sa Pandemic Agreement niadtong 2025 ug mga kausaban sa International Health Regulations. Natukod usab ang Pandemic Fund nga nakahatag na og kapin sa $1.2 bilyon alang sa mga proyekto sa sobra 90 ka nasod, lakip na ang pagpalig-on sa surveillance, mga laboratoryo, ug pagbansay sa mga Health Workers.
Gawas niini, nilapad usab ang katakus sa genomic sequencing ug natukod ang mga sentro alang sa paghimo og bakuna ug biomanufacturing aron masiguro ang patas nga pag-abot sa medisina ngadto sa tanan.
Bisan pa niana, gihatagan og gibug-aton ni WHO Director-General Dr. Tedros Ghebreyesus nga “solidarity is the best immunity” (panaghiusa ang labing maayong resistensya) ug nanawagan siya og mas lig-on nga kooperasyon sa tibuok kalibotan. Sa luyo sa mga nakat-onan gikan sa COVID-19, gihisgotan sa WHO nga ang tinuod nga pagpangandam nagkinahanglan og padayon nga pagbantay sa dili pa ang outbreak sa sunod nga pandemya.
Photo courtesy: Academia Nacional de Medicina de Colombia
