Gipahibalo sa Bureau of Customs (BOC) kagahapong adlawa Martes, nga ilang nalabwan ang target nga kita alang sa Enero 2026 og kapin sa tunga sa bilyon ka pesos. Sumala sa BOC, niabot sa ₱80.744 bilyon ang nakolekta niining Enero, mas taas og ₱513 milyon kaysa sa gitakda nga target, nga adunay collection efficiency nga 100.6%. Mas taas usab kini og 1.9% o ₱1.490 bilyon kon itandi sa ₱79.254 bilyon nga nakolekta niadtong Enero 2025.
Gipasigarbo ni Customs Commissioner Ariel Nepomuceno nga ang maayong performance resulta sa hiniusang paningkamot sa mga kawani sa Customs ug mga stakeholders nga komitado sa pagsunod sa balaod ug reporma, subay sa tinguha sa administrasyon alang sa kalig-on sa ekonomiya ug kaluwasan sa publiko.
Matod ni Nepomuceno, ang paglapas sa ilang target sa Enero usa ka lig-on nga pagpamatuod sa kakugi sa ilang mga personahe ug sa nagkadakong kooperasyon sa trade community. Dugang pa niya, komitado sila sa pagpadayon niini nga ang-ang sa kaepektibo aron suportahan ang economic agenda sa Presidente ug ipakita ang kapasidad sa BOC sa paghatag og kasaligang serbisyo publiko.
Gipahayag sa BOC nga nakatabang sa pagpataas sa kita ang gipakusgan nga mga enforcement operation sa tibuok nasod, diin niresulta kini sa 66 ka malampusong operasyon ug pagkasakmit sa mga kontrabando ug smuggled goods nga gibanabanang nagkantidad og ₱886.8 milyon.
Lakip sa kinadak-ang nasakmit niadtong Enero ang mga ilegal nga droga nga nagkantidad og kapin sa ₱309 milyon, lakip ang ₱114.566 milyones nga kantidad sa droga nga gitago sa kargamento nga gideklarar nga mga mala-KITE (malachite) stones.
Photo courtesy: Pinoy Expose
