Human sa positibong feedback ug dagsa sa mga katawhan sa Philippine Women’s Open, gipahayag sa Pinay tennis ace nga si Alex Eala nga ang labing unang WTA tournament sa nasod nagsilbi nga “wake-up call” alang sa mga stakeholder nga dugangan pa ang paningkamot sa pagpalambo sa dula.
Nalipay si Eala nga nahimong bahin sa Philippine Women’s Open, diin iyang nakita nga usa ka paagi aron mahatagan og pagtagad ang potensyal sa pagmugna og mga lokal nga talento. Apan gitudlo sa WTA No. 45 player ang panginahanglan nga sulbaron ang kakuwang sa mga lokal nga kompetisyon, ilabi na sa women’s tennis.
Ang Philippine Tennis Association (PHILTA) nagkanayon nga nagplano sila nga magpahigayon og dugang lokal nga mga torneyo aron tubagon kini nga panawagan, taliwala sa nagkadakong interes sa sport.
Sumala pa ni PHILTA Secretary General John Rey Tiangco, daghang mga hagit kon mag-organisa og mga torneyo, kinahanglan sab adunay pang lalaki, pang babaye, ug juniors.
Dugang niya, ang problema sa kababayen-an, dili igo ang gidaghanon sa mga magdudula nga mosalmot. Karon lahi na tungod kay nakasinati na sila og dula dinhi ug nakita nila nga adunay oportunidad alang kanila nga modula sa dagkong turneyo.
Si Tiangco, nga usa usab ka kanhi tennis player, nagtuo nga ang WTA 125 tournament magbukas sa dalan alang sa mga kausaban sa kalamboan sa dula. Matod niya, kasagaran human sa juniors, mobalhin ang mga players sa laing career o laing sport tungod sa kakuwang sa oportunidad. Apan karon, gusto nila nga i-promote ang women’s tennis uban ang inspirasyon gikan kang Alex Eala.
Photo courtesy: PHILTA
