Gipahimangnoan sa Philippine National Police (PNP) ang publiko nga magpabiling magbinantayon taliwala sa padayon nga pagsaka sa mga cryptocurrency ug online investment scams, human natala ang ginatos ka mga kaso sa miaging tuig.
Sumala ni PNP chief Gen. Jose Melencio Nartatez Jr., kinahanglang mag-amping ang mga Pilipino sa mga online platform nga nagsaad og dili katuohan nga kita o tubo.
Base sa datos sa PNP Anti-Cybercrime Group (ACG), miabot ngadto sa 311 ka kaso sa investment scam ang natala gikan sa Enero 1 hangtod Disyembre 31, 2025. Sa gidaghanon, 12 ka kaso ang adunay kalabotan sa mga cryptocurrency schemes.
Gipakita sa mga report nga sagad danihon sa mga scammer ang ilang mga biktima pinaagi sa saad nga dako kaayo nga kita, ug sa pipila ka higayon, tugotan pa ang inisyal nga pag-withdraw aron makuha ang ilang pagsalig.
Sa ulahi, awhagon ang mga biktima nga mag-recruit og uban pa sa dili pa hingpit nga i-block ang access sa ilang mga account, nga moresulta sa dakong pagkalugi sa kwarta.
Nagpahamatngon usab si Nartatez nga dili lang kwarta ang anaa sa peligro, kondili pati na ang personal nga seguridad sa mga biktima.
Sa katapusan, gitambagan sa PNP ang publiko nga i-verify ang mga investment platform, likayan ang mga tanyag nga adunay “guaranteed” nga taas nga kita, ug dili ihatag ang personal nga banking o account details online.
Photo courtesy: Federal Bureau of Investigation
