Gipadangat ni City IPMR Datu Roberto Cabaring ang iyahang kabalaka tungod sa ubay-ubay nga natalang aksidente sa kadalanan partikular na sa Macahambus padulong Cabula area nga nahisakop sa Barangay Lumbia ug Barangay Bayanga syudad sa Cagayan de Oro.
Kagahapong adlawa, atol sa regular nga sesyon, gisaysay ni Datu Cabaring ang mga obserbasyon sa nahisgutang accident prone area kung asa, aduna ray mga warning signs, apan mas nindut sab nga dugangan ang mga signages nga mas pinasahi labi pa kasagaran sa mga driver mahulog nalang nga gina-ignore ang ubang mga signage tungod ilaha na kining naandan.
Aduna sab mga parte sa dalan nga gikan sa 4 lanes, kalit nalang nga na-two lanes nga nakahatag sab og peligro sa mga motorista.
Tungod sa kabalaka, gihangyo ni Datu Cabaring ang mga kaubanan sa konseho nga magpahigayon og pagtuon ug magpatabang sa mga hingtungdang ahensya sa gobyerno aron nga makamugna og mas konkretong plano nga mapakunhuran ang aksidente sa nahisgutang lugar.
Dugang gipunting sa konsehal, kung subayon ang kultura nilang mga lumad, ang paghalad og ritwal sa lugar labi pa nga ginadevelop na kini ug posibleng natugaw sab ang mga elemento nga anaa sa area. Kini pagtahud nalang sab sa kinaiyahan.
Sa ulahing bahin, aron mas matuki ug aron mahatagan kinig kasulbaran, nahiusahan sa konseho nga hisgutan kini sa komitiba sa traffic ug infrastructure.
Kahibaluang, lakip sa aksidente nga natala sa Macahambus-Cabula area ang aksidente sa tuig 2024 nga gikalambigian sa usa ka motor ug tricab; tuig 2025 nga nagresulta sa kamatayon sa tulo katawo; ug karong tuiga, sa bulan sa Enero, natuwang ang usa ka trak nga nagkarga og bugas.
Photo courtesy: Cagayan de Oro City Council
