Daghang pamaagi sa pag-atiman sa problema sa mga nalambigit sa ilegal nga droga sa Cagayan de Oro City ug dili tanan basta nalang pangdakpon ug prisohon, kini ang pamahayag ni Konsehal Roger Abaday, kinsa Vice Chairman sab sa City Anti-Drug Abuse Council (CADAC) atol sa programang “Inyong Konseho Karon”.
Sumala pa ni Konsehal Abaday nga gawas sa hugot nga pagpatuman sa balaod may kalabutan sa pagpangdakop sa mga tigpayuhot og illegal nga druga, gina-require sa balaod ang pagtukod og Balay Silangan o rehabilitation centers alang sa mga indibidwal nga naadik sa paggamit sa ginadiling droga.
Ning kasamtangan, abuna nay pasilidad ang syudad nga nahimutang sa Upper Puerto ug matod pa ni Konsehal Abaday nga usa sa gitutokan sa CADAC karong tuiga, ang pagrenovate niini nga pasilidad.
Labing gikinahanglan nga mahatagan og medikal nga atensyon ang mga naadik sa droga ug mapailawom sa rehabilitation program labi na kadtong personal nga nitahan sa ilang kaugalingon ngadto sa awtoridad ug willing nga mag bag-o ug biyaan sa hingpit ang bisyo.
Giawhag sa mga opisyal ang tanan labi na kadtong mga ginakanan nga perming giyahan ang ilahang mga anak ug dili konsentihon nga mosulod sa bisan unsa nga bisyo.
Photo courtesy: City Information Office
