Sugdan sa Cebu Youth Basketball League (CYBL), ang usa basketball league sa Sugbo, ang ilang tinuig nga “March Madness” tournament karong Marso 15, nga gilauman nga moapil ang kapin sa 100 ka team.
Sumala ni Popoy Navarro, tournament organizer ug SBP Region 7 director, magpadayon ang CYBL sa paghatag og taas nga lebel sa kompetisyon samtang ipataas pa ang sumbanan sa torneyo.
Karong season, opisyal nang gamiton ang FIBA Stats system, lakip ang pagpalusad og online portal aron masubay sa mga players ang ilang performance.
Magsangka ang mga grupo sa lima ka dibisyon: Under-11 Under-13, Under-15, Under-17, ug Under-18, nga adunay mga 20 ka team matag dibisyon. Padayon ang torneyo hangtod Mayo, nga mosakop sa kadaghanan sa summer break.
Ipahibalo ang pinal nga format sa torneyo human makompleto ang rehistrasyon sa mga team. Karong tuig, ipaila usab ang bag-ong venue sa Magnum Sports Center sa Barangay Apas, gikan sa kanhing Sacred Heart School gymnasium.
Photo Courtesy: Fastbreak
