Gisalikway ni Presidente Ferdinand “Bongbong” Marcos Jr. ang mga panawagan nga ideklarar ang Chinese Ambassador sa Pilipinas nga si Jing Quan nga persona non grata, matod sa Malacañang niadtong Huwebes, bisan pa sa nagkataas nga pressure gikan sa mga magbabalaod taliwala sa nagkagrabe nga tensyon sa West Philippine Sea (WPS).
Matod ni Palace Press Officer Undersecretary Claire Castro sa usa ka ambush interview sa dihang gipangutana bahin sa mga sugyot nga papahawaon ang Chinese envoy. Gisubli niya nga wala motugot ang Presidente nga ideklarar ang usa ka ambassador nga persona non grata.
Mitumaw ang isyu human sa hait nga mga pulong tali sa mga opisyal sa Pilipinas ug sa Embahada sa China bahin sa mga aksyon sa Beijing sa WPS. Daghang mga senador ang nagpahayag sa ilang tuyo nga magpasaka og resolusyon nga nag-awhag sa Presidente nga ideklarar ang pipila ka mga opisyal sa embahada sa China nga persona non grata.
Dili moubos sa 15 ka mga senador ang mipirma sa usa ka gisugyot nga resolusyon nga nagkondena sa bag-o nga mga pahayag nga gihimo sa Embahada sa China sa Manila, nga giingon sa mga magbabalaod nga nagpalala sa tensyon sa diplomasya.
Matod pa sa Malacañang, mas gusto ni Presidente Marcos nga sulbaron ang panaglalis pinaagi sa “lig-on nga aksyon nga may diplomasya,” nga nagpasiugda sa pagpugong taliwala sa nagpadayon nga gubat sa pulong.
Photo Courtesy: PCO
