Giklaro sa opisina sa PAGASA sa Malaybalay nga ang bag-ohay lang nga pag-ubos sa temperatura nga naobserbahan sa pipila ka bahin sa Pilipinas, lakip ang Bukidnon—ilabi na sa gabii ug sayong buntag—dili direktang gipahinabo sa pagbag-o sa klima.
Sumala sa PAGASA, ang katugnaw tungod sa kini nga kahimtangan sa northeast monsoon o hanging amihan nga nagdala og bugnaw nga hangin gikan sa mga rehiyon sama sa Siberia ug uban pang mga lugar nga kasagarang natabunan sa yelo. Kini ang hinungdan nganong nagpabilin nga ubos ang temperatura bisan dili na Disyembre, nga tradisyonal nga giisip nga bugnaw nga panahon.
Gipasabot ni Raul Montilla, Weather Specialist I sa PAGASA Malaybalay, nga taas ang range sa northeast monsoon, ug ang transition period niini mahimong molungtad pa hangtod Oktubre diin base sa ilang padayon nga monitoring, miabot sa 19°Celsius ang average nga temperatura sa kinatibuk-ang Probinsya sa Bukidnon, samtang ang pinakaubos nga nasukod miabot pa gayud sa 18°Celsius sa dakbayan sa Malaybalay
Gitambagan ni Montilla ang publiko nga ipadayon ang pagmonitor sa mga advisory sa PAGASA, labina sa gabii ug sayong kabuntagon, aron malikayan ang mga potensyal nga risgo sa kahimsog nga nalangkit sa katugnaw—ilabina sa mga bata, mga tigulang, ug kadtong adunay huyang nga resistensya.
Photo Courtesy: PAGASA MALAYBALAY
