Gipahibalo sa Philippine Coconut Authority (PCA) Iligan ug Lanao del Norte ang detalyadong impormasyon kalabot sa gidaghanon sa mga indibidwal nga coconut lumber dealer ug prosesor nga ilang gi-orient kabahin sa mga balaod ug regulasyon nga gipatuman sa ahensya.
Kini ang gipadayag ni Engr. Faiz Macakiling, Division Head sa PCA–Iligan ug Lanao del Norte Provincial Office, atol sa eksklusibong pakighinabi sa Juander Radyo News Team.
Matod pa ni Engr. Macakiling, sa kasamtangan adunay gatusan kapin sa mga indibidwal nga dealer ug prosesor sa lubi ang nakatambong na sa gipasiugdahang orientation nga gipahigayon mismo sa buhatan sa PCA.
Sumala pa, ang maong mga orientation nagsubay sa Republic Act 8048 nga gi-ammend o mas nailhan isip Coconut Preservation Act, nga nagtumong sa hugot nga pagdili sa pagputol sa mga kahoy nga lubi.
Bisan pa niini, adunay mga exemption nga gitugot pinaagi sa Permit to Cut, nga gikinahanglan nga i-apply ug aprobahan una sa PCA.
Samtang gipasiugda usab sa buhatan sa PCA nga padayon ang ilang pagpahigayon og mga orientation ug pahimangno sa mga dealer ug prosesor, aron malikayan ang paglapas sa balaod ug masiguro ang husto nga pagpanalipod sa industriya sa lubi sa probinsya.
