Gihatagan og klarong pahimangno ni Dr. Maria Lourdes Tiongco gikan sa Local Economic Development Investment Promotion kon LEDIP office ang mga Micro, Small and Medium Enterprises kun (MSMEs) ug mga yanong konsumante nga adunay katungod ang matag usa sa pagreklamo batok sa mga isyu sa Business Permits ug Real Property Tax, apan gikinahanglan kini buhaton sa husto ug matinud-anong paagi.
Kini iyang gipahayag atol sa napahigayong Kapehan sa Iligan Chamber,kagahapong adlawa, Enero 29, 2026.
Matod pa ni Dr. Tiongco, kung adunay mga reklamo, ang angay buhaton mao ang pagduol una sa mga hingtungdang buhatan ug dibisyon sa gobyerno, tungod kay abli kanunay ang pultahan sa mga ahensya aron maminaw ug motubag sa mga kabalaka sa katawhan.
Dugang pa niya, dili angay nga magdali sa pagreklamo kon wala pa’y klarong basihan, aron malikayan ang pagtumaw sa mga isyu nga makapahinay sa solusyon ug dili makahatag og kaayohan sa kadaghanan.
Gipasiugda usab ni Dr. Tiongco ang kamahinungdanon sa public hearing, ug iyang giawhag ang mga konsumante nga aktibong mosalmot niini aron masabtan ug masayran ang mga programa, polisiya, ug benepisyong ipatuman sa gobyerno alang sa katawhan.
